Մերիլին Մոնրոյի անշնչացած մարմինը՝ առանց հագուստի և անբնական դիրքով՝ հեռախոսը ձեռքին, հայտնաբերվել է 1962 թվականի լույս օգոստոսի 5-ին: Պաշտոնական վարկածի համաձայն՝ դերասանուհին ինքնասպանություն է գործել. քննության համաձայն՝ դերասանուհին ընդունել է ավելի քան 40 հաբ՝ բարբիտուրատ։ Հայտնի է, որ դերասանուհին նևրոտիկ վիճակում էր և օգտագործում էր հանգստացնող միջոցներ։ Այս գործոնը, հնարավոր է, արդարացնում է ինքնասպանության վարկածը։ Սակայն մինչ այսօր՝ 60 տարի անց դեռևս առեղծված է մնում Ամերիկայի սեքս-խորհրդանիշի մահը, և շատերը վստահ են, որ Մոնրոյի մահվան հետևում գաղտնիք է թաքնված:
Մերիլին Մոնրոյին սպանել է ԿՀՎ-ն
Սպանության տեսություններից մեկի համաձայն՝ Մոնրոյին կործանել է Քենեդի ընտանիքի հետ սերտ կապը: ԿՀՎ-ին «պատվիրել» են վրեժ լուծել նախագահ Ջոն Քենեդիից Կուբա ձախողված ներխուժման համար: Բայց ինչո՞ւ Մոնրոյի միջոցով: 2003 թվականին Մեթյու Սմիթն իր «Զոհը. Մերիլին Մոնրոյի գաղտնի գրառումները» գրքում գրում է, որ ԿՀՎ-ն գիտեր դերասանուհու և Քենեդի եղբայրների հետ սիրավեպի մասին: Մոնրոյին սպանելով՝ գերատեսչությունը ցանկանում էր ճնշում գործադրել նախագահի և նրա ընտանիքի վրա։ 2015-ին Սմիթի տեսությունը հաստատվում է ԿՀՎ-ի պաշտոնաթող աշխատակցի խոստովանությամբ, որ հենց ինքն է սպանել Մոնրոյին: Այնուամենայնիվ, ավելի ուշ պարզվում է, որ սպայի խոստովանությունը ոչ այլ ինչ էր, քան կեղծ լուր:
Մերիլինին պատահաբար սպանել են նրա բժիշկները
Մեկ այլ գիրք Մերիլին Մոնրոյի կյանքի և մահվան մասին գրել է Դոնալդ Սպոտոն՝ 1993 թվականին։ Հեղինակի խոսքով՝ Մոնրոն ստել է բժիշկներին իր բուժման մասին, ինչի արդյունքում նրան դեղերի սխալ չափաբաժին են նշանակել։ Տնային տնտեսուհու՝ Յունիս Մյուրեյի (նա առաջինն է հայտնաբերել Մոնրոյի դին) օգնությամբ Մերիլինի մահը որակվել է որպես ինքնասպանություն։ Չնայած ոստիկանության հաղորդումներին և տնային տնտեսուհու հայտարարություններին, Սպոտոյի վարկածը քիչ աջակցություն է ստանում և մերժվում է:
Մերիլին Մոնրոյին սպանել է մաֆիան
1982 թվականին մասնավոր հետախույզ Միլո Սպերիլյոն սենսացիոն հայտարարություն արեց՝ Մոնրոյին սպանել են արհմիության ղեկավար Ջիմի Հոֆան և Չիկագոյի բանդայի ղեկավար Սեմ Ջանկանան։ Սպերիլյոն մանրամասն բացատրում է իր տեսությունը «Մերիլինի սպանությունը․ գործը փակված է» գրքում. Չնայած կասկածելի ապացույցներին, դետեկտիվի գիրքը հանգեցրել է Մերիլինի մահվան գործի վերաբացմանը: Սակայն նոր հետաքննությունից հետո Լոս Անջելեսի շրջանային դատախազը փակել է գործը:
Մերիլին Մոնրոյին սպանել է Ռոբերտ Քենեդին
Մերիլինի մահից հետո առաջին վարկածներից մեկի համաձայն՝ նախագահ Քենեդիի կրտսեր եղբայրը՝ Ռոբերտն է սպանել դերասանուհուն, քանի որ վախենում էր, որ նա կխոսի իրենց սիրավեպի մասին, և իր քաղաքական կարիերան անկում կապրի։
Նույն վարկածը հնչեցրել է Ֆրենկ Կապելը 1962 թվականին իր «Մերիլին Մոնրոյի տարօրինակ մահը» գրքում։ Կապելի տարբերակը մեծ աջակցություն չստացավ, կրքերը հանդարտվեցին։ Բայց 1973-ին գրող Նորման Մեյլերը «կրակի վրա յուղ լցրեց»՝ հրապարակելով Մերիլինի մեկ այլ կենսագրություն, որտեղ պնդում է, որ դերասանուհուն սպանել է նրա սիրեկանը՝ սենատոր Ռոբերտ Քենեդին: Մեյլերը չուներ հստակ ապացույց, բայց գովազդն աշխատեց. գիրքը վաճառվում էր խելահեղ թվերով:
Երկու տարի անց այս տեսության մեկ այլ հետևորդ՝ լրագրող Էնթոնի Սկադուտոն հոդված է գրել, որում մի քանի աղբյուրի հիման վրա բացատրում է, թե ինչու է Քենեդին սպանել Մոնրոյին։ Նրա կարծիքով՝ դերասանուհին չափից շատ քաղաքական գաղտնիքներ գիտեր, որոնք գրում էր իր գաղտնի օրագրում:
Եվ, վերջապես, ինքնասպանություն
Մերիլին Մոնրոյի երրորդ և վերջին ամուսինը՝ ամերիկացի դրամատուրգ Արթուր Միլլերը, նրանց շարքին է պատկանում, որոնք հավատում են, որ Մերիլին Մոնրոն իսկապես ինքնասպան է եղել:
Իր ինքնակենսագրականում նա կնոջը նկարագրում է որպես անինքնավստահ կին՝ կասկածելով նրա մասնագիտական տաղանդին։ Մոնրոն հաճախ էր դժգոհում, որ Հոլիվուդում իրեն միայն էրոտիկ հիմար աղջիկների դերեր են առաջարկում։
Դերասանուհու մահից մի քանի շաբաթ առաջ նրա կարիերան փլուզման եզրին էր։ Միլլերը մեջբերում է Մոնրոյի խոսքերը՝ վկայելով նրա խորը հիասթափությունը կյանքից և աշխատանքից.
«Հոլիվուդն այն վայրն է, որտեղ նրանք կարող են քեզ առաջարկել 1000 դոլար համբույրի և ընդամենը 50 ցենտ՝ քո հոգու համար»:
