Tech Transparency Project հետազոտական խումբը շահույթ չհետապնդող Campaign for Accountability-ի զեկույցում ասում է, որ Amazon-ի մի շարք մատակարարներ կապված են եղել ույղուրական աշխատանքային ճամբարների հետ: Չինաստանի այս փոքրամասնությունը հիմնականում կենտրոնացած է Սինցզյան-ույգուրական ինքնավար մարզում։ Վերջին մի քանի տարիների ընթացքում ույղուրները ենթարկվել են բռնաճնշումների երկրի իշխանությունների կողմից, ներառյալ՝ տեղավորումը ճամբարներում, մշտական հսկողություն, զանգվածային ստերիլիզացում և հարկադիր աշխատանք:
TTP-ի զեկույցը ցույց է տալիս, որ Amazon-ի մատակարարներն օգտագործում են ույղուրներին աշխատանքային ծրագրերում, որոնք կամավոր չեն և սերտորեն կապված են աշխատանքային ճամբարների հետ: Հետազոտողները նշում են հինգ ընկերություններ, որոնք հրապարակայնորեն մեղադրվել են մահմեդական փոքրամասնության հարկադիր աշխատանք կիրառելու մեջ։ Այս վաճառողները Amazon-ի համար պատրաստում են հետևյալ ապրանքները՝ Echo, Fire TV, Kindle, Amazon Basics-ի որոշ տեսակներ և շատ ավելին:
TTP-ն հայտնում է, որ Luxshare Precision Industry-ը, AcBel Polytech-ը և Lens Technology-ն իրենք են կիրառել հարկադիր աշխատանք, մինչդեռ GoerTek-ը և Hefei BOE Optoelectronics-ը համագործակցում են մատակարարների հետ, որոնք, հայտնի է, որ օգտագործում են ույղուրներ իրենց արտադրանքի համար: Մարդու իրավունքների խախտումները Luxshare-ում և Lens Technology-ում հայտնել են Information-ը և Washington Post-ը՝ Apple-ի հետաքննության համատեքստում:
Amazon-ի մատակարարման ստանդարտները բացահայտորեն արգելում են հարկադիր աշխատանքը: Կանոնակարգում ասվում է, որ ցանկացած աշխատանք պետք է լինի կամավոր։ TTP-ն նաև բացահայտեց մի շարք հաշիվներ, որոնք վկայում են Սինցզյան բամբակի առաքումների մասին, որոնք արգելված են ԱՄՆ կառավարության կողմից:
Այս տարվա սկզբին Wall Street Journal-ը քննադատել էր Tesla-ին տարածաշրջանի մայրաքաղաք Ուրումչիում ցուցասրահ բացելու համար: Ընկերությանը մեղադրել են նաև Lens Technology-ի հետ համագործակցելու մեջ։
Amazon-ի խոսնակ Էրիկա Ռեյնոսոն շտապեց ասել, որ ընկերությունը համապատասխանում է օրենքներին և կանոնակարգերին այն բոլոր իրավասություններում, որտեղ գործում է: Amazon-ն ակնկալում է, որ իր բոլոր մատակարարները կհամապատասխանեն առաքման չափանիշներին: Ռեյնոսոն ավելացնում է, որ ընկերությունը միջոցներ է ձեռնարկում, երբ հայտնաբերում է հարկադիր աշխատանք և մարդու իրավունքների այլ խախտումներ։
Անցյալ դեկտեմբերին Washington Post-ը զեկուցեց չինական Huawei-ի ներգրավվածության մասին Սինցզյանում աշխատանքային ճամբարների և հսկողության համակարգերի տեխնոլոգիայի մշակման մեջ: Հրատարակությունը ներկայացրել է շնորհանդեսների մոտ հարյուր հատված, որոնք նշվել են՝ որպես գաղտնի։ Այս տեղեկատվությունը ցույց է տալիս Huawei-ի համագործակցությունը Չինաստանի կառավարության հետ 2014-2020 թվականներին։
Այս ամառվա սկզբին ԱՄՆ իշխանությունները պատժամիջոցներ սահմանեցին Չինաստանից 14 ընկերությունների նկատմամբ՝ երկրի մահմեդական բնակչության նկատմամբ խտրական քաղաքականության մեջ նրանց ներգրավվածության պատճառով: Ամերիկյան ընկերությունները չեն կարողանա նրանց հետ համագործակցել առանց հատուկ լիցենզիայի։
2014 թվականին Չինաստանի իշխանությունները բռնաճնշումներ են սկսել ույղուրների դեմ, որոնք ներառում են մահմեդական բնակչության ներկայացուցիչներին «վերակրթական ճամբարներ» ուղարկելը, հարկադիր աբորտները, աշխատուժը, ստերիլիզացումը և մզկիթների ավերումը։ Այս գործողությունները հանգեցրել են Պեկինի խտրական քաղաքականության մեկնարկից ի վեր հինգ տարվա ընթացքում տարածաշրջանում ծնելիության 24%-ով կրճատման։
Սիրարփի Աղաբաբյան
168.am
