2022 թվականը հարուստ է լինելու հայտնի գրքերի կինոադապտացիաներով, ներառյալ այն գրքերը, որոնք երբեք չեն հայտնվել մեծ էկրաններին:
Առանձնացրել ենք 2022 թվականին սպասվող էկրանավորումները։ Տեսնենք, արդյո՞ք ռեժիսորների տեսլականը կհամընկնի գրքերի հեղինակների երևակայությանը:
Persuasion
Ֆիլմը Ջեյն Օսթինի վեպի 6-րդ ադապտացիան է: Սա պատմություն է 27-ամյա անգլուհի Էնն Էլիոթի մասին, որը նշանադրության խզումից 7 տարի անց պատահաբար հանդիպում է իր նախկին նշանածին:
Դակոտա Ջոնսոնը, որն առավել հայտնի է «Մոխրագույնի հիսուն երանգները» ֆիլմում Անաստասիայի դերակատարմամբ, կմարմնավորի համեստ արիստոկրատ Էննին։ Փեսացուի կերպարը կմարմնավորի Կոսմո Ջարվիսը։
Կինոռեժիսորները խոստանում են, որ հին պատմությունը կներկայացնեն ժամանակակից մոտեցմամբ:
The School for Good and Evil
Բարի և Չարի դպրոցը ամերիկացի գրող Սոման Չայնանիի ֆանտազիա ժանրի գրքերի շարք է, որը պատմում է 2 ընկերների կյանքի մասին մի կախարդական դպրոցում, որտեղ երեխաներին սովորեցնում են դառնալ հեքիաթի հերոսներ կամ չարագործներ: Սոֆին երազում է դառնալ արքայադուստր և ամուսնանալ արքայազնի հետ, մինչդեռ Ագաթան չշփվող ու մռայլ երեխա է: Սակայն Սոֆիին ընդունում են Չարի դպրոցում, իսկ Ագաթային` Բարի:
Սոման Չայնանիի ստեղծագործությունների կինոադապտացիան համարվում է 2022 թվականի ամենասպասված ֆիլմերից մեկը: Սոֆիի և Ագաթայի դերերը կկատարեն երիտասարդ դերասանուհիներ Սոֆիա Էնն Կարուզոն և Սոֆիա Ուայլին, իսկ Շարլիզ Թերոնը էկրանին կհայտնվի՝ որպես Չարի դպրոցի ուսուցչուհի:
Blonde
Շուտով մեծ էկրաններ կբարձրանա Նորմա Ջին Բեյքերի, նույն ինքը՝ Մերլին Մոնրոն, կյանքի մասին պատմող կենսագրական ֆիլմը։ Շիկահեր դիվայի դերը կկատարի Անա դե Արմասը։ Սա դերասանուհու կյանքի մասին պատմելու հերթական փորձ չէ, այլ Ջոյս Քերոլ Օութսի 2000 թվականի համանուն վեպի ադապտացիան։
Գրողի նպատակն էր այնպես անել, որ իր ստեղծագործությունն ընկալվի որպես գեղարվեստական, այլ ոչ թե կենսագրական:
Անա դե Արմասի գործընկեր Ջեյմի Լի Քերթիսն այսպես է մեկնաբանել գլխավոր հերոսուհու խաղը. «Ես ընկա հատակին: Ես չէի կարող հավատալ դրան: Չկա Անա. միայն Մերլինն է»։
Pinocchio
Ռեժիսոր Ռոբերտ Զեմեկիսը, որն աշխարհին է նվիրել «Վերադարձ դեպի ապագա» և «Ֆորեսթ Գամփ» ֆիլմերը, նախագծում է Կառլո Կոլոդիի «Պինոքիոյի արկածները» հեքիաթի ադապտացիան։ Պինոքիոյի «հոր» դերակատարը Թոմ Հենքսն է, իսկ դերասանական կազմում հանդես են գալիս նաև Լյուկ Էվանսն ու Ջոզեֆ Գորդոն-Լևիտը։
Ֆիլմը կլինի Disney-ի դասական մուլտֆիլմի խաղային վերագործարկումը: «Պինոկիոն» 1940 թվականին Ուոլթ Դիսնեյի երկրորդ լիամետրաժ նախագիծն էր։ Հայտնի է, որ նոր ֆիլմում կներառվեն նախորդ դարում ստեղծված օրիգինալ երգեր, իսկ նոր երաժշտական ստեղծագործությունների հեղինակը կլինի Ալան Սիլվեստրին:
Mr. Harrigan’s Phone
2022 թվականին ամենապասված ֆիլմերից է նաև Սթիվեն Քինգի «Միստր Հարիգանի հեռախոսը» վեպի կինոադապտացիային։ Հանրաճանաչ գրողի գրքերի հիման վրա նկարահանվել են տասնյակ ֆիլմեր և սերիալներ, իսկ նրա վեպի հիման վրա նկարահանված The Shawshank Redemption-ը IMDb կայքի լավագույն ֆիլմերի վարկանիշում զբաղեցնում է 1-ին տեղը։
Պատմության սյուժեի կենտրոնում Քրեյգ անունով մի տղա է։ Նա աշխատանքի է անցնում տարեց պարոն Հարրիգանի մոտ: Գրքերի ու սմարթֆոնների նկատմամբ հետաքրքրության շնորհիվ տղան ու ծերունին ընդհանուր լեզու են գտնում։ Երբ Հարիգանը մահանում է, Քրեյգը հաղորդագրություն է ուղարկում իր մահացած ընկերոջը և հանկարծ պատասխան է ստանում նրանից։
Գլխավոր դերերում հանդես կգան Դոնալդ Սազերլենդը և Ջեյդեն Մարթելը:
vnews.am
