Լեգենդար ներդրող և մեր ժամանակների ամենաազդեցիկ բարերարներից մեկը՝ Ուորեն Բաֆեթը, անգնահատելի խորհուրդ է տվել այն մասին, թե ինչ է նշանակում ապրել առանց ափսոսանքի։ Երջանիկ ու իմաստալից կյանքի գաղտնիքը, ըստ գործարարի, կարելի է երկու բառով արտահայտել՝ ծառայել մարդկությանը։
Ըստ Inc. ամսագրի, այս գաղափարն արտացոլում է սիրո, կարեկցանքի և ծառայության կարևորության մասին խորը ճշմարտությունը, որը Բաֆեթը արտահայտել է իր հայտնի մեջբերումում.
«Որքան շատ ես տալիս սիրուն, այնքան շատ ես ստանում»:
Ի՞նչ է նշանակում ծառայել մարդկությանը
Բաֆեթն ընդգծում է, որ կյանքի հիմնական նպատակը ոչ թե հարստություն կուտակելը կամ կարգավիճակ ձեռքբերելն է, այլ բարության և հոգատարության ժառանգություն ստեղծելը։ Կարևոր է.
- փնտրել լավը ուրիշների մեջ,
- դադարեցնել կոնֆլիկտները՝ գտնելով ընդհանուր լեզու,
- ձգտել հասկանալ մեկ ուրիշին, նախքան հասկացված լինելը,
- ցուցաբերել կարեկցանք՝ լսելով առանց նախապաշարումների:
Դա յուրաքանչյուրին որպես սեփական երազանքների, վախերի և նպատակների տեր մարդ տեսնելու և նրանց հարգանքով վերաբերվելու ունակությունն է, նույնիսկ եթե համաձայն չեք նրանց հետ:
Բաֆեթի համար հաջողությունը որոշվում է ոչ թե բանկային հաշվի չափով, այլ նրանով, թե որքանով են մարդիկ գնահատում և հիշում ձեզ: Նա ընդգծել է.
«Եթե դու հասնում ես իմ տարիքին, և ոչ ոք քո մասին լավ չի մտածում, ինձ չի հետաքրքրում, թե որքան մեծ է քո բանկային հաշիվը, քո կյանքը աղետ է»:
Բաֆեթն այս ուղերձը հղել է Georgia Tech-ի ուսանողներին՝ բացատրելով, որ հաջողությունը չափվում է հարգանքի, վստահության և սիրո մակարդակով, որը դուք ստանում եք ուրիշներից:
Բաֆեթը շարունակում է իր խոսքերն ապացուցել իր գործողություններով։ Նրա Giving Pledge նախաձեռնությունը, որը հրավիրում է հարուստներին իրենց ունեցվածքի մեծ մասը նվիրաբերել բարեգործությանը, հանրությանը ծառայելու կենդանի օրինակ է:
Այսօրվա աշխարհը մեզ հաճախ սովորեցնում է բաժանում և ատելություն, բայց Բաֆեթն առաջարկում է այլընտրանքային ճանապարհ: Մարդկությանը ծառայելու նրա կոչը մեզ հիշեցնում է սիրով և կարեկցանքով փոխգործակցելու կարևորության մասին: Արդյունքում, այն ներդաշնակություն է բերում մեր հարաբերություններին, մեզ ավելի գրավիչ է դարձնում ուրիշների համար և թողնում դրական ժառանգություն:
