Պարզվում է, որ մեզ բոլորիս քաջածանոթ «Սանտա Բարբարա» հեռուստասերիալն ամենևին էլ պատմության ամենաերկարը չէ։ Այս կատեգորիայի սերիալների ցանկում առաջին տեղում ամուր ամրագրվել է ամերիկյան The Guiding Light / «Ուղղորդող լույսը», որի պրեմիերան կայացել է ռադիոյով 1937 թվականին: Այն ընդհանուր առմամբ ունեցել է ավելի քան 15 000 դրվագ։
Այս հոդվածով առանձնացրել ենք աշխարհի ամենաշատ դրվագներ ունեցող սերիալները։
5. The Young and the Restless / Երիտասարդ և հանդուգն / Молодые и дерзкие, 1973 թվականից մինչև մեր օրեր
The Young and the Restless-ը ստեղծել են Ուիլյամ Ջ.-ն և Լի Ֆիլիպ Բելամին: Ամերիկյան այս բազմամաս սերիալն առաջին անգամ ցուցադրվել է 1973 թվականի մարտին՝ հայտնվելով աշխարհի շատ երկրների տարբեր ալիքների եթերներում։ Սերիալի գործողությունները տեղի են ունենում Վիսկոնսին նահանգի Ջենովա Սիթի հորինված քաղաքում։ Պատմությունն ի սկզբանե կառուցվել է Ջենովա Սիթիի երկու հիմնական ընտանիքների՝ Բրուքսների և Ֆոսթերի շուրջ: Հետագայում հերոսները ավելի են շատացել, միջանձնային և միջընտանեկան հարաբերությունները՝ բազմազանացել։
Սերիալն ի սկզբանե հեռարձակվում էր շաբաթական 5 անգամ 30 րոպեանոց դրվագներով։ Իսկ 1980 թվականից սկսած դրվագների տևողությունը կրկնապատկվել է։ The Young and the Restless-ը ամերիկյան հեռուստատեսության ամենաբարձր վարկանիշ ունեցող ցերեկային դրաման է:
4. All My Children / Իմ բոլոր երեխաները / Все мои дети, 1970 — 2011
Սերիալը, որը ստեղծվել է Ագնես Նիքսոնի կողմից և հեռարձակվել է 1970 թվականին, տեղի է ունենում Փենսիլվանիայի Փայն Վելլիում՝ Ֆիլադելֆիայի արվարձաններից մեկում։ Ինչպես նախատեսվում էր, սերիալը պետք է բարձրացներ ժամանակակից հասարակության բոլոր սուր սոցիալական խնդիրները, օրինակ՝ Վիետնամի պատերազմի թեման։ Իսկ Էրիկա Քեյնի գլխավոր դերը մարմնավորած դերասանուհի Սյուզան Լուչին էր, որի կերպարը համարվում է հեռուստատեսության պատմության ամենահայտնի հերոսը։
Սյուժեն կառուցված է Էրիկա Քեյնի ընտանիքի կյանքի շուրջ։ Ի դեպ, 1973 թվականի դրվագներից մեկում գլխավոր հերոսուհի Էրիկան որոշում է ընդհատել հղիությունը. այստեսակ դրվագ առաջին անգամ էր ցուցադրվել հեռուստատեսությամբ։ Բացի այդ, «Իմ բոլոր երեխաները» սերիալն առաջիններից էր, որը խոսեց պլաստիկ վիրաբուժության և դրա հոգեբանական հետևանքների մասին:
3. One Life to Live / Մի կյանք ապրելու համար / Одна жизнь, чтобы жить, 1968 — 2012
Ամերիկյան սերիալը, որը ստեղծվել է նույն Ագնես Նիքսոնի կողմից և առաջին անգամ ցուցադրվել է 1968 թվականի հուլիսի 15-ին ABC հեռուստաալիքով, առաջին հեռուստատեսային դրաման է, որը վեր է հանում ռասայական խտրականությունները և թմրամոլությունը գեղարվեստական Լլանվյու քաղաքի քաղաքացիների միջոցով: Այս սերիալի դրվագների տևողությունը տատանվում էր 29 րոպեից մինչև մեկ ժամ։ Հեռարձակվել է 11․096 սերիա։
2002 թվականին սերիալը արժանացել է «Էմմի» մրցանակի՝ «Լավագույն դրամատիկ սերիալ» անվանակարգում։ 2005 թվականին սերիալը արժանացել է GLAAD Media Awards մրցանակին՝ ԼԳԲՏ խնդիրների լուսաբանման համար։ Բայց 2011 թվականի ապրիլի 4-ին ABC-ն հայտարարեց, որ շոուն կչեղարկվի մոտ 43 տարվա եթերից հետո։ Ի դեպ, դերասանուհի Էրիկա Սլեզակը, ով համարվում է շոուի գլխավոր հերոսուհին, նկարահանվել է բոլոր չորս տասնամյակներին։ Հոլիվուդյան շատ աստղեր իրենց կարիերան սկսել են այս ֆիլմում նկարահանվելով՝ Ջուդիթ Լայթը, Ռոմա Դաունին, Լոուրենս Ֆիշբերնը, Թոմի Լի Ջոնսը, Մարիո Վան Փիբլսը, Ռայան Ֆիլիպը և այլք:
2. As the World Turns / Ինչպես է պտտվում երկրագունդը / Как вращается мир, 1956 — 2010
Ամենաերկար սերիալների շարքում երկրորդ տեղում է «Ինչպես է պտտվում երկրագունդը» սերիալը։ Քսան տարի՝ 1958-1978 թվականներին, այն ամերիկյան ամենադիտվող հեռուստասերիալն էր։ Ընդհանուր առմամբ հրապարակվել է 13,858 դրվագ, նկարի ընդհանուր ժամանակը տևել է մոտ 10,400 ժամ: Մեկ սերիան սկզբում տևում էր 30 րոպե, ինչը նորամուծություն էր, քանի որ մինչ այդ հեռուստասերիալները ցուցադրվում էին 15 րոպեանոց դրվագներով։ Ֆիլմը պատմում է հորինված Օքդեյլ քաղաքի գլխավոր ընտանիքների կյանքի, հոգեբանական որոնումների ու առօրյա խնդիրների մասին։ Պատմելու այս մոտեցումը ստանդարտ է դարձել բոլոր սերիալներում:
Սերիալն աչքի է ընկնում նրանով, որ իր ամբողջ պատմության ընթացքում երբեք չի փոխել այն քաղաքը, որտեղ նկարահանվել և արտադրվել է։ Դրվագները տեղափոխվել են միայն Նյու Յորքի մի շրջանից մյուսը. նկարահանումների առաջին 43 տարիներն անցկացվել են Մանհեթենում, իսկ 1999 թվականից՝ Բրուքլինում:
1․ The Guiding Light / Ուղղորդող լույսը / Путеводный свет, 1937 — 2009
Ինչպես արդեն նշվեց, 15 հազար դրվագների ընթացքում հեռուստադիտողները հետևել են հերոսների կյանքի վերելքներին և վայրէջքներին. այս նվաճումը նշվում է Գինեսի ռեկորդների գրքում: Սկզբում սյուժեն, որը գրել էր նախկին ուսուցչուհի Իրնա Ֆիլիպսը, կառուցված էր Չիկագոյի արվարձանում ապրող քահանայի շուրջ, բայց հետո ավելի ու ավելի շատ կերպարներ հայտնվեցին։ Ժամանակի ընթացքում «Ուղղորդող լույսը» դարձավ ամերիկյան վեց ընտանիքների պատմություն, որոնք կապված են ամենաբարդ հարաբերություններով: Իսկ սցենարիստ Իրնա Ֆիլիպսը սերիալային ժանրի հիմնադիրներից էր։
2009 թվականի ապրիլին CBS-ի ղեկավարները հեռուստադիտողներին տեղեկացրին, որ սերիալը չեղարկվելու է ցածր վարկանիշի պատճառով։ Վերջին դրվագը հեռարձակվել է 2009 թվականի սեպտեմբերի 18-ին։
