Սուրճը և թեյը ամենաակնառու միջոցն են էներգիայի ավելացման համար ելույթից կամ որևէ այլ կարևոր իրադարձությունից առաջ, որտեղ դուք պետք է խոսեք: Այնուամենայնիվ, կոֆեին պարունակող ըմպելիքները կարող են բացասական ազդեցություն ունենալ ձեր ձայնի վրա։ Հաղորդակցության մասնագետ Ժաննա Վոզժովան Газета.Ru-ին պատմել է, թե ինչու և ինչով է պետք փոխարինել սուրճը և ինչպես կարելի է ձայնն ավելի հաճելի դարձնել զրուցակցին։
Մասնագետի խոսքով՝ սուրճն ու կոֆեին պարունակող ըմպելիքները ջրազրկում և կոկորդի չորացում են առաջացնում։
«Թունդ սև սուրճը «քայքայում է» ձայնալարերի լորձաթաղանթը, ինչի հետևանքով դրանք ժամանակավորապես կորցնում են իրենց առաձգականությունը։ Դուք կարող եք զգալ չորություն, քանի որ կոֆեինը խթանում է խորխի արտադրությունը, և դուք չեք կարողանա վերահսկել ձեր ձայնը», – ասել է նա:
Եթե դուք արդեն դատարկել եք ձեր բաժակ սուրճը, ապա ելույթից առաջ մի բաժակ գազավորված ջուր խմեք:
«Կոֆեինը արագացնում է նյութափոխանակությունը՝ ստիպելով մարմնին ավելի շատ ջուր պահանջել՝ պատշաճ գործելու համար: Ձայնալարերը նույնպես խոնավացման կարիք ունեն, բայց նույնիսկ մեկ բաժակ ջուրը չի օգնի, եթե այն խմեք անմիջապես խոսելուց առաջ. ջուրը չի հասցնի կարճ ժամանակում ներծծվել արյան մեջ»,- ասել է փորձագետը։
Մասնագետը նաեւ բացատրել է, թե որ ըմպելիքները կօգնեն արագ խոնավացնել ձայնալարերը և ավելի առույգ զգալ։
«Տաք կանաչ թեյ, բանանի սմուզի, մեղրով սենյակային ջերմաստիճանի գազավորված ջուր, իսկ եթե հակացուցումներ չունեք՝ նռան հյութ. ձայնը կարգի բերելու համար նախապատվությունը տվեք այս ըմպելիքներին»,- նշել է Վոզժովան։
Մասնագետը նաև խորհուրդ է տվել ելույթից մեկ օր առաջ խուսափել առատ տապակած և յուղոտ ուտելիքներից՝ դրանք օրգանիզմում քնկոտության զգացում են առաջացնում։ Փոխարենը կարևոր իրադարձությունից 3-4 օր առաջ ավելացրեք ձեր սննդակարգում ավելի շատ մրգեր, բանջարեղեն և ձուկ, այդ դեպքում մեկ բաժակ սուրճ և ընդհանրապես կոֆեին պետք չի լինի, և առանց դրա դուք կզգաք եռանդուն:
