Հայտնի միլիարդատեր Իլոն Մասկը խոստանում է անվանափոխված Twitter-ը (X) դարձնել աշխարհի ամենաթանկ ապրանքանիշը։ Պլանավորված նորամուծությունները X-ը կվերածեն ֆինանսական կենտրոնի` օգտատերերին հնարավորություն տալով կառավարել իրենց ֆինանսները: Ճիշտ է, ընկերությանը սպասվում են նաև հնարավոր իրավական խնդիրներ՝ կապված «X» տառի մտավոր սեփականության իրավունքների հետ։
Twitter-ը դարձնել աշխարհի ամենաթանկ ապրանքանիշը
Իլոն Մասկը վերջերս հայտարարեց, որ մտադիր է իր Twitter սոցիալական հարթակը, որը վերաբրենդավորվել է որպես X, դարձնել աշխարհի ամենաթանկ ապրանքանիշը: Այս հայտարարությունը Մասկը հրապարակել է Twitter-ի իր էջում՝ մեկնաբանելով փորձագետի խոսքերը, որը ենթադրում էր, որ անվանափոխությունից հետո Twitter ապրանքանիշի արժեքը կնվազի ավելի քան 40 միլիարդ դոլարով։
«X-ը կդառնա աշխարհի ամենաթանկ ապրանքանիշը: Հիշե՛ք իմ խոսքերը»,- գրել է Մասկը։
Մասկը նախկինում ասել էր, որ Twitter անվանումն այլևս չի արտացոլում այս միկրոբլոգային հարթակի բնույթն ու գործառույթները, ուստի այն ստացել է նոր անվանում՝ «X»։ Ռեբրենդինգի շրջանակում Twitter-ը նույնպես թարմացրել է իր լոգոն։ Սովորական կապույտ թռչնի փոխարեն այժմ կայքում կարող եք տեսնել սև ու սպիտակ «X» տառը։ Մասկի խոսքով՝ տարբերանշանը դեռ վերջնական տեսքի կբերվի։ Twitter-ի պաշտոնական էջը նույնպես վերանվանվել է X, իսկ ընկերության գրասենյակը լուսավորվել է նոր տարբերանշանով։
Հերթական նորամուծությունները Twitter-ում
Ակնկալվում է, որ Twitter-ը շուտով նոր գործառույթներ կներկայացնի իր օգտատերերին։ Նախատեսվող նորամուծությունների մասին պաշտոնական հայտարարություն է հայտնվել ընկերության սեփականատեր Իլոն Մասկի էջում։
«Առաջիկա ամիսներին մենք կավելացնենք տեղեկության համապարփակ փոխանակում և ձեր ամբողջ ֆինանսական աշխարհը կառավարելու հնարավորություն»,- գրել էր գործարարը:
Թե կոնկրետ ինչ նկատի ունի նա դրանով և ինչպես է աշխատելու նորացված հարթակը, դեռ լիովին պարզ չէ։
Twitter-ը, որը գործարկվել է 2006-ին, դարձել է ամբողջ աշխարհում 140 նիշից բաղկացած կարճ հաղորդագրությունների փոխանակման հանրաճանաչ գործիք: Որոշ ժամանակ անց գրառումներում նիշերի թույլատրելի քանակը կրկնապատկվեց՝ հասնելով 280-ի, ինչը օգտատերերին հնարավորություն տվեց ավելի ազատ արտահայտել իրենց մտքերն ու գաղափարները։ Այժմ հարթակը կարող է անճանաչելիորեն փոխվել։
Twitter-ին դատական հայցեր են սպասվում X-ի անվանափոխվելու համար
Ինչպես տեղեկացնում է Reuters-ը, Twitter-ը «X» վերանվանելու Իլոն Մասկի որոշումը կարող է իրավական հետևանքներ ունենալ ընկերության համար, քանի որ արդեն կան այլ ընկերություններ, որոնք իրավունք ունեն «X»-ը օգտագործել որպես մտավոր սեփականություն։
Ապրանքանիշերի հարցերում մասնագիտացած իրավաբան Ջոշ Գերբենն ասում է, որ Twitter-ի դեմ դատական հայցերի մեծ հավանականություն կա: ԱՄՆ-ում կան մոտ 900 ապրանքանիշեր, որոնք պարունակում են «X» տառը, և այնպիսի ընկերություններ, ինչպիսիք են Microsoft-ը և Meta-ն, արդեն իրավունք ունեն օգտագործել այս տառը իրենց ապրանքների և ապրանքանիշերի համար:
Microsoft-ը X-ն օգտագործում է Xbox ապրանքանիշը գովազդելու համար, իսկ Meta-ն գրանցել է կապույտ և սպիտակ X-ը «ծրագրային ապահովում» և «սոցիալական մեդիա» կատեգորիաներում օգտագործելու համար։ Եթե ընկերությունները ապացուցեն, որ X նոր սոցիալական հարթակի լոգոները և գովազդները սպառողների մոտ շփոթություն են առաջացնում, նրանք կարող են փոխհատուցում պահանջել կամ արգելել X-ի օգտագործումը։
