Netflix հոսքային հարթակը դադարեցրել է «Fate: The Winx Saga» սերիալի շարունակությունը, հայտնել է նախագծի հեղինակ Բրայան Յանգը։
Յանգը նշել է, որ հպարտանում է նկարահանող խմբով և կատարած աշխատանքով։ Նրա խոսքով՝ թիմը մեծ ջանքեր է գործադրել աշխարհն ու կերպարները ստեղծելու համար։ Ռեժիսորը շնորհակալություն է հայտնել հանդիսատեսին և սերիալի երկրպագուներին։
«Դա զարմանալի չորս տարի էր: Հուսով եմ՝ ապագայում նորից կհանդիպենք»,- ասել է նա։
«Fate: The Winx Saga»-ն իտալական Winx Club անիմացիոն ֆիլմի ադապտացիան է: Ըստ սյուժեի` Բլում անունով աղջիկը պարզում է, որ ինքը փերի է, և ընդունվում է կախարդուհիների ակադեմիա։
Netflix-ի սերիալն ունի երկու սեզոն։ Վերջինի պրեմիերան կայացել է 2022 թվականի սեպտեմբերի 16-ին։ Դերերում՝ Էբիգեյլ Քոուեն, Հաննա վան դեր Վեսթհայզեն, Փրեշես Մուստաֆա, Էլիոթ Սոլթ, Էլիշա Էփլբաում։
