Ինչպես հայտնի երգում է ասվում` «աշնանային տերևները, որ սահում են պատուհանից…», այո, հուշում են, որ տաք հագնվելու ժամանակն է:
Դեղինի ու կանաչի «արքա» աշունը ֆավորիտ եղանակ է հատկապես բոլոր նրանց համար, ովքեր ամառվա տապից հոգնած ու մի քիչ էլ սպառված, մեծ անհամբերությամբ սպասում են լոնգսլիվերի, ժակետների ու պիջակների հետվերադարձին:
Վստահաբար, ուզում ես թարմացնել աշնանային զգեստապահարանդ ու անհամբեր սպասում ես այս տարվա թրենդային նորություններին: Իսկ հետո՞: Հետո կշտապես Երևան Մոլ` գտնելու քո սիրելի լուքերն ու համալրելու այս տարվա աշնանային հավաքածուներդ:
Այս բլոգը, ինչպես հասկացար, ոսկե աշնան թրենդերի մասին է:
2022 թվականի աշուն/ձմեռ նորաձևության միտումների համընդհանուր տրամադրությունը կարելի է ամփոփել մեկ բառով՝ նոստալգիա: Ի դեպ, նոստալգիա` հարմարեցված տարիքին, փորձառությանն ու հետաքրքրություններին:
Աշնանային նորաձևության 2022-ի պահանջները արի ուսումնասիրենք միասին:
Երկարափեշ զգեստներ
Թեև մինիները, վստահաբար, միշտ աչք շոյող են ու թրենդային, բայց այս աշունը երկա՜ր, հատակին հասնող փեշերով զգեստների «մասին» է:
Պանկ ֆուտուրիզմ
Punk-ը վերադառնում է աշնանային նորաձևության առաջատար դիրքեր, ինչպես վկայում են Louis Vuitton-ի, Dior-ի, Givenchy-ի նոր հավաքածուները՝ ֆուտուրիստական, «ըմբոստ» և չենթարկվող կտորներով, վանդակավոր, կաշվե կամ ծանր մետաղական զարդանախշերով:
Դասականն ու լյուքսը
Մինչ թենիսը, գոլֆը և քանթրի ակումբների էսթետիկան իշխում են գարնանն ու ամռանը, աշունը նախապատրաստում է նորարարական մոտեցումներ ու շունչ` դասական հիմքերի վրա: Ծալքավոր կիսաշրջազգեստներ և բլեյզերներ, բոմբերներ և տրիկոտաժներ՝ լյուքս ոճով, օրինակ՝ կաշվից և արհեստական մորթուց: Բացի այդ, մոդայիկ են նաև հաստլիկ տակացուներով կոշիկները, որոնք արդիական և թրենդային են դարձնում դպրոցականների լուքերը:
Կաշի, կաշի և նորից կաշի
Կաշին համարձակորեն ներխուժում է բոլոր նորարարական հավաքածուներում: Khaite-ն, Versace-ն և Roberto Cavalli-ն հասցրել են հիացնել նրբագեղ կաշվե հավաքածուներով: Ի դեպ, կաշվի հետ այս աշնանը համադրվում են նաև վառ գույներն ու փայլերը:
Էսքտրա մեծ վերարկուներ
Այո, այս տարվա աշնանային թրենդերից մեկը «պապիկի վերարկուներն» են: Հարմարավե՞տ են, գուցե: Գունային գամման պաստելային կարող է լինել, հեշտ համադրելի հագուստի մնացած դետալների հետ:
Ծնկից վեր երկարաճիտ կոշիկներ
Վերադարձել են մեր սիրած երկարաճիտ կոշիկները` բազմաթիվ «նորություններով»` նոր գունային գամմա, կտորների և կաշվի բազմազանություն, կրունկների նոր ձևեր ու տեսակներ: Ի դեպ, Վիկտորիա Բեքհեմը և Իզաբել Մարանտը հանդես են եկել երկարաճիտ կոշիկների աչքի ընկնող տարբերակներով:
Տնային տաբատներ
Անցյալ աշնանը ցանկացած շքեղ զգեստապահարանում կար գոնե մեկ ճեղքվածքով լեգինս՝ համադրված լոֆերների և մեծ չափի կաշմիրե տրիկոտաժի հետ: Արդյունքում ստացված տեսքը անհերքելիորեն շքեղ էր: Բայց այս տարի տաբատների նոր ոճը գրավել է բոլոր խանութների ցուցափեղկերն ու հակադրվում է նեղ լեգինսներին` լայնությամբ և «տնային», «չխնամված» տեսքով: Պրակտիկություն. ահա այն, ինչի համար ստեղծվել են այս տաբատները:
Սովորաբար, երբ մտածում ենք աշնանային գույների մասին, միանգամից մի քանիսն են մտքում գալիս՝ մուգ կարմիր, մանանեխի կանաչը, շոկոլադե շագանակագույն, որսորդական, մուգ կանաչ և այլն: Բայց այս աշունն ավելի դեղին, վարդագույն ու կապույտ կլինի` պաստելային երանգներով:
Հագուստի թրենդը, իհարկե, թրենդ, բայց աշունն առանց տաք թեյի ու սիրելի տաք շարֆերի մի քիչ անիմաստ կլինի: Այնպես որ աքսեսուարների թրենդերին էլ անպայման հետևիր, որ «սազես» աշնան հետ:
Zara, Bershka, Stradivarius, Mango ու էլի շա՜տ ապրանքանիշեր, որ պատրաստ են շլացնել քեզ իրենց նոր հավաքածուներով: Իսկ դու պատրա՞ստ ես աշնանային գնումներին: Շտապի՜ր Երևան Մոլ` տաք ու թրենդային հագնվելու, մինչ մենք կպատրաստենք նոր բլոգ հատուկ նորաձևությունը գնահատողներիդ` քեզ համար:
