Կանոնավոր սթրեսի և հուզական ծանրաբեռնվածության պատճառով բազմաթիվ հիվանդություններ են առաջանում։ Вести պարբերականի փոխանցմամբ՝ «Ամենակարևորների մասին» հաղորդաշարի ընթացքում կլինիկական հոգեբան, հոգեբանական գիտությունների թեկնածու Գալինա Տկաչենկոն պատմել է, թե ինչպես է սթրեսն ազդում մեր օրգանիզմի վրա։
Բժիշկը նշել է, որ ամեն ինչ վերահսկելու ցանկությունը, կենտրոնացման ու հիշողության հետ կապված խնդիրները քրոնիկական սթրեսի ախտանիշներ են։ Երկարատև ծանր սթրեսը հանգեցնում է տարբեր հիվանդությունների սրման։
Գլխացավեր, մկանային ցավեր
Սթրեսի ժամանակ արտազատվում է մեծ քանակությամբ ադրենալին և նորադրենալին, ինչը հանգեցնում է ամբողջ օրգանիզմի լարվածության։
«Տևական լարվածությունից կարող են առաջանալ տեղային ցավեր՝ մեջքի, պարանոցի մկանային ցավեր և, իհարկե, գլխացավեր», – ընդգծել է մասնագետը։
Նյութափոխանակության համախտանիշ
Բացի այդ սթրեսի ժամանակ արտադրվում է մեծ քանակությամբ սթրեսի հորմոն՝ կորտիզոլ։ Բժշկի խոսքով՝ կորտիզոլը կարող է դանդաղեցնել մարսողության գործընթացը։
«Շատ հաճախ սթրեսի ժամանակ մենք չափից շատ ենք ուտում, հետևաբար ավելորդ քաշ է առաջանում», – հավելել է Գալինա Տկաչենկոն։
Շնչառական անբավարարություն
Սթրեսային իրավիճակների պատճառով նյարդային հողի վրա մարդու մոտ կարող է առաջանալ բրոնխոսպազմ։
«Սթրեսի հետևանքով կարող է լինել բրոնխային ասթմայի սրացում», – ասել է կլինիկական հոգեբանը։
Անքնություն
Անքնությունը սթրեսի ամենատարածված ախտանիշն է։ Բացի այդ, անքնությունը մեծացնում է դիաբետի զարգացման վտանգը։
Բորբոքային հիվանդություններ
Կորտիզոլը սթրեսի հորմոն է, որը նվազեցնում է իմունիտետը և խթանում բորբոքային ցիտոկինների առաջացումը։ Իսկ ցիտոկինները հանգեցնում են բորբոքման ախտանիշների առաջացմանն ու քրոնիկ հիվանդությունների սրացմանը։
Զարկերակային հիպերտոնիա
Սթրեսին ի պատասխան՝ արագանում է սրտի ռիթմը, մեծանում է արյան րոպեական ծավալը, և արյան հոսքը դեպի մկաններ մեծանում է։
