Բլոգեր Ռոբերտ Սքոբլը թվիթերում նշում է, որ ակնկալում է, որ Apple-ի որոնման ծառայությունը կգործարկվի հաջորդ տարի: Նա նշում է, որ այս ենթադրությունը հիմնված է տարբեր աղբյուրների հետ զրույցների վրա։ Սքոբլն ասում է, որ դա կլինի բոլոր ժամանակների ամենաթանկ արտադրանքի թողարկումը: Բլոգերի խոսքով՝ որոնողական համակարգը չի հայտարարվի WWDC ցուցահանդեսում, որը կսկսվի հունիսի 6-ին, այլ հաջորդ տարվա հունվարին։
Ելնելով Alphabet-ի ֆինանսական ցուցանիշներից, հայտնի է դառնում, որ կոնգլոմերատն իր գովազդային եկամուտների մեծ մասը ստանում է որոնման համակարգի միջոցով։ Անցյալ տարի ընկերությունը 210 մլրդ դոլար է վաստակել։
TechRadar-ի լրագրողի խոսքով՝ iOS-ով և Safari-ով սարքերի թիվը հասել է կրիտիկական զանգվածի, այս գործոնը կարող է օգնել Apple-ին հաջողությամբ մրցակցել Google-ի հետ որոնման ոլորտում։
Տարիներ շարունակ Apple-ը օգուտ է քաղել մի գործարքից, որի համաձայն՝ Google որոնողական համակարգը տեղադրված է Safari-ում: Անցյալ տարվա օգոստոսին Google-ը դրա համար վճարեց 15 միլիարդ դոլար, իսկ այս տարի այդ արժեքը կարող է աճել մինչև 18-20 միլիարդ դոլար, կարծում են վերլուծաբանները։ Հունվարի դատական հայցն ընդդեմ Google-ի և Apple-ի, ցույց է տալիս, որ ընկերությունների միջև պայմանավորվածությունը ենթադրում է, որ Apple-ը հրաժարվում է իր որոնողական համակարգի մշակումից:
Հեղինակը կարծում է, որ եթե Apple-ը դադարեցնի Google-ի հետ գործարքը, ապա Safari-ի միլիարդավոր լսարանը հիմք կդառնա որոնողական համակարգի հետագա զարգացման համար։ Ինչը, ամենայն հավանականությամբ, կդառնա հակամենաշնորհային հետաքննության առարկա:
Այնուամենայնիվ, լայն ծածկույթը միշտ չէ, որ երաշխավորում է հաջողություն, ինչպես դա եղավ Microsoft-ի դեպքում, որը չկարողացավ առաջադիմել որոնման ոլորտում: Միաժամանակ կորպորացիան վերահսկում է Windows օպերացիոն համակարգը, որն ամենամեծն է օգտատերերի քանակով։
Հավանական է, որ Apple-ի նոր ծառայությունը ավանդական որոնման համակարգի տեսք չի ունենա: Սքոբլը նշում է, որ արտադրանքը ստեղծվելու է Google-ի լուծումները ընդլայնելու համար:
Սիրարփի Աղաբաբյան
168․am
